មនុស្សគ្រប់រូបតែងតែជួបនៅការលំបាកចិត្ត ឬ អារម្មណ៍តានតឹង ដែលអារម្មណ៍បែបនេះគឺជា អារម្មណ៍ដែលមនុស្សគ្រប់រូបមាន ហើយមិនអាចជៀសផុតបានឡើយ។ មនុស្សគ្រប់រូប តែងមានការសម្របសម្រួលទៅនិងអារម្មណ៍បែបនេះ រៀងៗខ្លួនដែលអាចបន្ធូរបន្ថយបានទៅតាម បញ្ហាតូចឬធំ និង ទៅតាមមនុស្សមា្នក់ៗ ។
តើអ្នកធ្លាប់គិតពីវិធីដែលអាចបន្ថយអារម្មណ៍ទុកសោកក្រៀមក្រំនេះដែលឬទេ?
ថ្ងៃនេះខ្ញុំនិងលើកយកវិធី៥យ៉ាងដែលអ្នកអាចនឹងធ្លាប់គិតដល់ ដែលជាវិធីក្នុងការជួយបន្ថយឬបំផ្លិចទុកសោកក្រៀមក្រំ ដែលខ្ញុំបានព្យាយាមគិត និង តែងនិពន្ធឡើងក្នុងគោលបំណងសង្ឃឹមថាលោកអ្នកនឹងអាចសាកល្បងអនុវត្ត ហើយរីករាយក្នុងការអានអត្ថបទនេះ។
វិធីទី១ រៀបចំគម្រោងផែនការរបស់អ្នក
គិតអំពីគោលដៅរបស់អ្នកដែលអ្នកតែងស្រមៃ ដូចជា អ្នកចង់អភិវឌ្ឍខ្លួនឯង ចង់បញ្ចប់ការសិក្សាដោយជោគជ័យ ចង់បានការងារដែលល្អប្រសើរ ចង់ជួបជុំបងប្អូន ចង់បង្កើនចំណេះដឹង ចង់ជួបគូររបស់អ្នកជាដើម។ ហើយសរសេរគោលដៅទាំងនោះចូលទៅក្នុងក្រដាស់ឬសៀវភៅមួយ និង ព្យាយាមសម្រេចគោលដៅរបស់អ្នក ហើយឈប់គិតពីអ្វីដែលធ្វើឲ្យអ្នកមិនសប្បាយចិត្ត ព្រោះអ្នកមានគោលបំណងជាច្រើនដែលត្រូវធ្វើ។
វិធីទី២ ធ្វើលំហាត់ប្រាណ
ហាត់ប្រាណជាប្រចាំដើម្បីឲ្យរាង្គកាយអ្នករឹងមាំ អារម្មណ៍ស្រស់ស្រាយ ទឹកមុខស្រស់ថ្លា សុខភាពមាំមួន និង បញ្ចេញជាតិខ្លាញ់។ អ្នកនិងទទួលបាននូវអារម្មណ៍ល្អ និង ស្រឡេះក្នុងអារម្មណ៍ និង មានអារម្មណ៍ថាអ្នកមានរាង្គកាយដ៏គួរជាទីពេញចិត្ត។
វិធីទី៣ ការលើកលែង
ជាច្រើនលើកច្រើនសារមកហើយ ដែលអ្នកតែងមានអារម្មណ៍ មួរម៉ៅ តានតឹង ខឹង និងមិនពេញចិត្ត ចំពោះអាកប្បកិរិយាអ្នកដទៃ ដែលធ្វើមិនល្អមកលើអ្នក ឬ គ្រាន់តែគេធ្វើអ្វីមួយទាស់ចិត្តអ្នកដោយគេមិនដឹងខ្លួនសោះ។ ឈប់ជ្រួញចិញ្ចើមទៀតទៅហើយឲ្យអ្នកដទៃ ធ្វើកិច្ចការដែលគេពេញចិត្តធ្វើ ជួយលើកទឹកចិត្ត និង ឈប់ប្រកាន់ខឹង នូវអ្វីដែលគេធ្វើ នោះអ្នកនឹងទទួលបាននូវអារម្មណ៍រីករាយដោយមិនដឹងខ្លួនផងថាមកពីមូលហេតុនេះ។
វិធីទី៤ គេងឲ្យបានគ្រប់គ្រាន់
មានថ្ងៃខ្លះ អ្នកក្រោកពីគេងមកទាំងអារម្មណ៍មួរម៉ៅ ព្រោះអ្នកត្រូវក្រោកទាំងគេងពុំទាន់ឆ្អែត ។ អ្នកទៅសិក្សា ឬ បំពេញការងារទាំងអារម្មណ៍មិនល្អ អាចធ្វើឲ្យសុខភាពអ្នកចុះខ្សោយ ដែលជាហេតុធ្វើឲ្យអ្នកមានអារម្មណ៍ តានតឹង មួរម៉ៅ ឆាប់ខឹង និង ក្រៀមក្រំជាដើម ។ អ្នកគួរគេងឲ្យបានគ្រប់គ្រាន់ ដើម្បីបំពេញតម្រូវការរាង្គកាយ និង សុខភាពផ្លូវអារម្មណ៍របស់អ្នក អ្នកនិងទទួលអារម្មណ៍រីករាយតាំងពីក្រោកពីគេង និង មានថ្ងៃដ៏ល្អ។
វិធីទី៥ ស្នាមញញឹម
ស្នាមញញឹមគឺជាអំណោយមួយដ៏ល្អ ដែលយើងផ្តល់ឲ្យអ្នកដទៃ ហើយយើងក៏ចង់បានពីគេវិញផងដែរ ។ អ្នកនិងមានអារម្មណ៍ល្អពេញអ្នកដទៃ ញញឹមមករកអ្នក ហើយអ្នកក៏មានអារម្មណ៍ក្នុងការញញឹមទៅរកគេវិញផងដែរ ។ អ្នកគួរចាប់ផ្ដើមថ្ងៃថ្មីរបស់អ្នកជាមួយនឹងស្នាមញញឹម និង អារម្មណ៍ ស្រស់ស្រាយ។
 |
| Picture from: free.clipartof.com |
ស្នាមញញឹមជាអំណោយដែលល្អជាងគេលើលោក។
0 comments:
Post a Comment